OBRADOIROS DE DOBRAXE

Continuamos coas actividades programadas dende o Servizo de Normalización Lingüística, que desta volta desenvolve unha nova actividade para mellorar a oralidade en lingua galega do alumnado de ensino primario redondelán, denominada DOBRAXE NA ESCOLA.

Esta é una actividade lúdico educativa que ten como finalidade achegarlles aos nenos e nenas, dun xeito ameno e didáctico, o mundo da dobraxe, e contribuír a mellorar a súa competencia oral en lingua galega.

Dous consagrados actores da escena galega, Suso Pando e Manuel Pombal (FMEC Producións) desenvolven este proxecto que visitará sete centros de ensino redondeláns dende o 26 de xaneiro até o 3 de febreiro.

Os obradoiros desenvólvense primeiro, utilizando monicreques a través dun xogo dramático moi divertido no que os actores mostran todos os pasos da elaboración dunha película, dende a creación do guión ata a dobraxe da mesma.

Logo, sen abandonar o ton lúdico e teatral, preséntanlles os personaxes do “mini capítulo” que o alumnado participante vai dobrar ao galego. Aí descubrirán tamén exóticas versións orixinais, en idiomas que probablemente xamais escoitaran. A continuación ensaian entre todos os participantes un fragmento da película, e aprenden a encaixar as propias voces nas bocas dos personaxes. E finalmente fan gravacións coas súas propias voces e descobren o resultado.

Nesta actividade de dinamización lingüística participan un total de 635 alumnas e alumnos de 2º a 6º de primaria dos seguintes centros: CEP Santa Mariña, CEIP Alexandre Bóveda, CEIP Cedeira, CEIP Santo Paio de Abaixo, CEIP Outeiro das Penas, CEIP Quintela e CEIP Porto Cabeiro.